Finanzbericht 2019

Hei ass de Finanzbericht, deen op eiser Vollversammlung den 8. Juni 2020 präsentéiert ginn ass:

Betrag [€]
Konto423,68
Réckerstattungen déi mir nach maachen-320,76
Pfand fir 3 Gasfläschen75
Käschten déi nach iwwerholl ginn29,09
207,01
Iwwersicht – Stand 31.12.2019
Betrag [€]
Spende vu Veranstaltungen261,64
Spend vu Votum Klima fir d’Kachveranstaltung vum 27. September 2019166,04
Kontogebühr-4
423,68
Konto am Detail – Stand 31.12.2019

Oppene Bréif un de Ministère vun der Ëmwelt, dem Klima an der nohalteger Entwécklung

Hei ass eise Bréif, dee mir wärend der ëffentlecher Consultatioun zum Klima-Aktiounsplang mam Numm Plan national intégré en matière d’énergie et de climat (PNEC) un de Ministère vun der Ëmwelt, dem Klima an der nohalteger Entwécklung geschéckt hunn.

Gudde Moien,

Mat dëser E-Mail bezitt Foodsharing Luxembourg Stellung wärend der ëffentlecher Consultatioun zum Plan national intégré en matière d’énergie et de climat (PNEC)

Foodsharing Luxembourg ass ee Veräin ouni Gewënnzweck, deen d’Liewensmëtteloffäll zu Lëtzebuerg reduzéiere wëll. Aktuell ziele mir 55 Memberen a kommen eisem Ziel duerch verschidde Projete méi no. Dorënner sinn d’Ariichte vun ëffentlech zougänglechen Tauschplatze fir Liewensmëttel am private Kader, dem Opbau vu Kooperatioune mat Supermarchéen an anere Liewensmëttelbetriber fir d’Ofhuele vun onverkafbare Wueren an der Sensibiliséierung op diverse Veranstaltungen.

D’Reduktioun vun der Liewensmëttelverschwendung ass eng vun den Aktioune mat dem gréissten Impakt am Kampf géint d’Fortschreite vum Klimawandel. Engem IPCC-Spezial-Rapport no hunn déi global Liewensmëttelverloschter- a verschwendung tëschent 2010 an 2016 8 bis 10% vun den totalen Zäregasen ausgemaach [1]. Bis 2050 kéint ee weltwäit eleng duerch eng Reduzéierung vun der Liewensmëttelverschwendung tëschent 87,45 a 94,56 Gigatonnen CO2 aspueren [2]. Domat stellt dëst wëssenschaftlech gesinn eng vun den effektiivste Platze fir Zäregaser anzespueren duer [3].

Dowéinst begréisse mir, dass d’Liewensmëttelverschwendung zwee Mol am Plang erwäänt gëtt:
– Säit 79: “Im Abfallsektor sind alle Maßnahmen im nationalen Abfallwirtschaftsplan aufgelistet. Zusätzliche Maßnahmen werden mit der neuen Abfallverordnung eingeführt. In Bezug auf die Treibhausgasemissionen sind hier in erster Linie Maßnahmen relevant, welche eine Reduzierung des Abfallaufkommens erzielen. Insbesondere soll die Lebensmittelverschwendung bis 2022 um 50% gesenkt werden.”
– Säit 82: “Das Vermeiden von Lebensmittelverschwendung trägt entscheidend zur Emissionsreduktion bei. Die Kampagne „Antigaspi“ muss weitergeführt und intensiviert werden, um Abfälle entlang der gesamten Ernährungskette zu vermeiden.”

Leider feelt et aus eiser Sicht an dësem Plang awer nach u konkrete Léisunge fir Liewensmëttelverschwendung ze bekämpfen. Esou si mir ganz dermat averstan, dass d’Campagn “Antigaspi” weidergefouert an intensivéiert gi soll, mä wat heescht dat konkret?

Mir hunn hei e puer Virschléi, déi Dir iwwerhuele kënnt:
– Verbuet vum Ewechgeheie vun nach iessbare Liewensmëttel fir Butteker, wéi a Frankräich
– Ophiewe vum Verbuet Liewensmëttel, déi an Ariichtungen, wéi Kantinnen, Maison relaisen asw., iwwreg bleiwen ewechgeheien ze mussen an d’Verflichtung se Hëllefsorganisatiounen unzebidden oder anescht ze verdeelen
– Antrieden zur Ofschafung vum Mindesthaltbarkeetsdatum op Produkter, déi sech éiweg halen, op europäeschem Niveau, z.B. Esseg, Reis, Salz, Zocker
– Antrieden zur Ofschafung vun allen nach existéierende Vermarktungs-Normen, um Niveau vun der Europäischen Union an um Niveau vun der Wirtschaftskommissioun fir Europa vun de Vereenten Natiounen (UNECE)
– D’Campagn “Antigaspi” méi an de Schoulen abréngen. Vue dass d’Verschwendung an de Privathaushalter mat 72% [4] am stäerksten ass, ass eng ausféierlech Opklärung an Thematiséierung vum Problem a senge Léisungen e wichtege Bäitrag zum Klimaschutz; vu gezieltem a geplangtem Akafen, iwwert d’korrekt Lagerung bis hin zum korrekten Akachen an Afréiere vu Liewensmëttel.

Mir hoffen op eng Ergänzung vu konkrete Léisunge fir dass mir dës Problemer net ëmmer weider virun eis hier drécken. Bei Froe sti mir gären zu Ärer Verfügung.

Bescht Gréiss,
Foodsharing Luxembourg a.s.b.l.

[1]: IPCC Spezielle Rapport iwwert Klimawandel a Land, August 2019 (Kapitel 5): https://www.ipcc.ch/site/assets/uploads/sites/4/2019/11/08_Chapter-5.pdf
[2]: Project Drawdown iwwert Liewensmëttelverschwendung https://www.drawdown.org/solutions/reduced-food-waste
[3]: Project Drawdown mat enger Iwwersiicht mat Léisungen géint d’Klimakris https://www.drawdown.org/solutions/table-of-solutions
[4]: Zesummefaassung vun enger Studie iwwert d’Liewensmëttelverschwendung zu Lëtzebuerg: https://web.archive.org/web/20190201111744/http://antigaspi.lu/wp-content/uploads/2017/08/2016_03_Studie_FoodWaste_Luxemburg_Zusammenfassung.pdf

Kach-Stand op der #United4ClimateJustice

Wéinst der Demo United for Climate Justice de 27. September 2019 hu mir Snacke, Wraps, Zopp an Uebstzalot mat Liewensmëttel, déi ewech geheit gi wieren, fir jidderee preparéiert. Ingesamt hu mir 300 Portioune verdeelt.

Merci u jidderee wie gëschter laanschtkomm ass, matgehollef oder eis soss ënnerstëtzt huet.

Info-Stand um Last Summer Dance

Mir sinn dem Last Summer Dance Festival dankbar fir dass mir konnte mat engem Informatiounsstand de leschte Sonnde präsent sinn. Vill Leit waren interesséiert an hu mat eis geschwat oder hunn sech e puer Gadgets oder Reschter vun eisem Foodsharing Point matgeholl. E puer hunn sech der esou guer direkt op der Platz ugemellt. Ausserdeem huet ee vun eise Memberen ee Live-Interview um Radio ARA ginn.

World Disco Soup Day 2019

E puer vun eise Memberen hunn um World Disco Soup Day, de 27. Abréll 2019, un der Disco Soup zu Iechternach Deel geholl. Dësen Event gouf vu Slow Food Youth Luxembourg organiséiert a vun der Gemeng Iechternach a KlimaPakt ënnerstëtzt. Lokal Gruppe waren och bedeelegt.

Als éischt goufen mir ganz häerzlech mat enger frëscher Zopp a Smoothie begréisst. Nodeems mir eise Bauch gutt gefëllt haten, hu mir deenen anere Fräiwëllege gehollef d’Reschter ze verdeelen an opzeraumen.

Trotz dem Reen hu mir et genoss do gewiescht ze sinn a Gläichgesënnter kennenzeléieren. Mir freeën eis och op eng enk Zesummenaarbecht mat Slow Food Youth Luxembourg!

Fotoe vun dëser Veranstaltung sinn op der Facebook-Säit vu Slow Food Youth Luxembourg ze fannen.